Վերջին շրջանում Թուրքիայում հաճախակի են դարձել ցեղասպանության վերաբերյալ գրքերի տպագրումը, քննարկումների կազմակերպումը, որոնցում շատ հաճախ տեղ են գտնում. «Թուրքան պետք է անցյալի հետ առերեսվի» արտահայտությունները:

Այս քննարկումները հատկապես ակտիվացան լուսահոգի Հրանտ Դինքի սպանությունից հետո: Եղան նաեւ համարձակ մտավորականներ, որոնք չկարողանալով այլեւս տանել տարիներ շարունակ իրենց ուսերին ծանրացող բեռը, պաշտոնապես ներողություն խնդրեցին հայերից: Այս ներողություն խնդրող մտավորականների շարքերում էր նաեւ Ստամբուլի Գալաթասարայ համալսարանի դասախոս, դոկտոր, պրոֆեսոր Ահմեդ Ինսելը:

Վերջինիս եւ ընտանիքով Էրզրում քաղաքից գաղթած եւ ներկայումս Ֆրանսիայում բնակվող մտավորական Միշել Մարիանի միջեւ տեղի ունեցած «Հայկական տաբուի» շուրջ  քննարկման հիման վրա Արիան Բոնզոնը տպագրության է պատրաստել «Հայկական «Տաբուի» շուրջ երկխոսություն» գիրքը: Ավելի ուշ գիրքը թարգմանվել էր նաեւ ֆրանսերեն:

 Գրքի հրաատարակման առնչությամբ, Հրանտ Դինքի անվան միջազգային հիմնադրամի եւ «Իլեթիշիմ» հրատարակչության կողմից Ստամբուլի  Բիլգի համալսարանի Դոլափդերե համալսարանական ավանի BS2 սրահում կազմակերպվում է մամլո ասուլիս:

Ահմեդ Ինսելի եւ Միշել Մարիանի ասուլիսի մասին մամլո հաղորդագրության մեջ նշվում է հետեւյալը. «Մի՞թե արդեն հնարավոր է, որ հայերն ու թուրքերը դեմ առ դեմ քննարկեն անցյալում կատարված դեպքերը: Ահմեդ Ինսելն ու Միշել Մարիանը խոսում են միմյանց հետ` առանց արհեստական համաձայնության գալու եւ առանց աչքաթող անելու իրար նման գնահատականների հետ մեկտեղ նաեւ միմյանցից տարբերվող տեսակետները: «Միություն եւ առաջադիմություն» կուսակցության կառավարության արածը ցեղասպանություն համարող Միշել Մարիանի և դա մարդկության դեմ կատարված հանցագործություն որակող Ահմեդ Ինսելի այս երկխոսության մեջ ամեն մեկը կարող է գտնել իրեն հոգեհարազատ մի հատիկ», - գրում է «Ռադիքալ»-ը: