Թուրքիայի «Խաղաղություն եւ ժողովրդավարություն» կուսակցության  Բիթլիսի պատգամավոր Նեզիր Քարաբաշը, առաջ քաշելով այն միտքը, ըստ որի   1915 թ. Հայերը ենթարկվել են  կոտորածի,  խոսեց Թուրքիայի կառավարության կողմից   ներողություն խնդրելու անհրաժեշտության մասին,-գրում է հաբերթուրքը:

Ինչպես գրում է Hberturq-ը, Թաչ Դյուղյուն սրահում կայացած կոնգրեսի ժամանակ Խաղաղություն եւ ժողովրդավարություն կուսակցության դրոշից բացից այլ դրոշներ չեն եղել: Ելույթներն անցել են երկլեզու՝ քրդերեն և թուրքերեն, որն էլ մասնակիցների մոտ առաջացրել է մեծ ոգևորություն: «Թող ջարդվե´ն երեխաներին ուղղված ձեռքերը» իր ելույթում հաճախ օգտագործել է Նեզիր Քարաբաշը. «Թուրքիան մանուկների հանդեպ բռնություններ իրականացնող երկրներից մեկն է աշխարհում», -ասել է նա, ապա շարունակել հետևյալ կերպ. «1915 թ. մոտ մեկ միլիոն հայեր են կոտորվել: Նրանց թիվը էական չէ. հայերն ու բազմաթիվ պատմաբաններ ասում են, թե մեկ ու կես միլիոն է, Թուրքիայի պաշտոնական տեսակետով էլ եղել են 300-500 հազար: Նրանց քշեցին իրենց տնից ու տեղից: Նրանց` կին ու երեխա, աքսորեցին Թուրքիայի բոլոր կողմերից, քանզի հայերը,  եթե անգամ հիմնականում բնակվում էին Արևելյան եւ Հարավարևելյան Անատոլիայում, բայց եւ այնպես` նրանք ապրում էին անխտիր Թուրքիայի բոլոր շրջաններում: Թուրքիայից միլիոնից ավելի հայեր աքսորվեց Սիրիայի անապատները: Նրանց մեծ մասը սպանվեց Հատուկ կազմակերպության (Թեշքիլաթ-ի մահսուսա) մարդասպանների կողմից: Մի մեծ մաս սպանվեց տարբեր շրջանակների կողմից, որոնք նպատակ էին հետապնդում խլել նրանց ինչքն ու գույքը: Մի մեծ մաս էլ իր կյանքը կորցրեց ճանապարհին: Թուրքիան,  փոխանակ այս ճշմարտությունները երկրի ներսում քննարկելով,  գնահատական տա դրանց եւ, ինչպես դա արեցին աշխարհի բազմաթիվ երկրներ, այս փաստերը բացահայտելով` ներում հայցի, դեռ շարունակում է ձևացնել, թե իբր նման դեպք չի պատահել: Թուրքիայի հանրապետության  կառավարությունը պարտավոր է ներողություն խնդրել 3 ժողովդրից: Հայ ժողովրդից ներում պետք է հայցի այդ կոտորածները կատարելու, քուրդ ժողովրդից` նրան որոշ մեղքերի մեջ ներքաշելու և թուրք ժողովրդից էլ` 90 տարի շարունակ փաստերն աղավաղելով գաղտնի պահելու համար»: